पुणे: महाराष्ट्र नवनिर्माण सेनेचे प्रमुख राज ठाकरे यांनी आज मुख्यमंत्री देवेंद्र फडणवीस यांना त्यांच्या तिसऱ्या कार्यकाळासाठी शुभेच्छा दिल्या आहेत.
राज ठाकरे यांनी त्यांच्या ट्विटर अकाउंटवर (एक्स) पोस्ट करत फडणवीस यांच्या नेतृत्वाचे स्वागत केले. त्यांनी म्हटले की, “आज माझे स्नेही आणि भारतीय जनता पक्षाचे महाराष्ट्रातील नेते देवेंद्र फडणवीस यांनी तिसऱ्यांदा मुख्यमंत्रीपदाची शपथ घेतली, याबद्दल त्यांचं अभिनंदन. २०१९ मध्ये त्यांना ही संधी मिळायला हवी होती, पण त्यावेळी आणि नंतर २०२२ मध्ये जे घडलं, त्यामुळे ती संधी हुकली. असो, मात्र यावेळी महाराष्ट्रातील जनतेने महायुतीपेक्षा देवेंद्र फडणवीस यांना जे प्रचंड बहुमत दिलं आहे, ते एक मोठं मान्यता आहे.”
राज ठाकरे पुढे म्हणाले, “माझ्या आशेप्रमाणे, फडणवीस हे राज्य, मराठी माणसांसाठी आणि मराठी भाषा व संस्कृतीसाठी योग्य वापर करतील, असा मला विश्वास आहे.”
राज ठाकरे यांनी यावेळी स्पष्ट केले की, “पुढील ५ वर्षांत सरकारच्या कोणत्याही चांगल्या उपक्रमांना माझा आणि माझ्या पक्षाचा पाठींबा असेल. मात्र, जर सरकार चुकतंय आणि लोकांना गृहीत धरतंय असे जाणवले, तर जरी सध्या विधिमंडळात विरोध करणे शक्य नसलं तरी, आम्ही विधिमंडळाच्या बाहेर त्यांना त्यांच्या चुकांची जाणीव करून देऊ.”
शेवटी, राज ठाकरे यांनी मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि अजित पवार यांच्यासह त्यांच्याबरोबर असलेल्या मंत्रीमंडळातील सर्व सहकाऱ्यांना महाराष्ट्र नवनिर्माण सेनेच्या वतीने शुभेच्छा दिल्या.
यावेळी, राज ठाकरे यांनी सरकारच्या कार्यप्रणालीवर लक्ष ठेवण्याचा आणि कोणत्याही चुकांबद्दल आवाज उठवण्याचा इशारा दिला आहे, जो राज्याच्या आगामी राजकीय वातावरणावर महत्त्वपूर्ण ठरू शकतो.