कात्रज कोंढवा रस्त्याच्या भूसंपादनासाठी एक खिडकी योजना
रस्ता तयार करण्यासाठी सात जागा मालकांनी दाखविली तयारी
पुणे : कात्रज कोंढवा रस्त्याचे काम वेगाने करण्यासाठी आता दबाव वाढला आहे. गेल्या अनेक वर्षांपासून कात्रजकरांना वाहतूक कोंडीतून मार्ग काढावा लागत आहे. मोठ्या प्रमाणात अपघात होत असल्याने अनेकांना जीव गमवावा लागला आहे. विधानसभा निवडणुकीची प्रक्रिया पार पाडल्यानंतर पुणे महापालिका वेगाने कामाला लागली असून रस्त्याचे काम सुरु केले आहे. या रस्त्यासाठी आवश्यक असलेले भूसंपादनाची प्रक्रिया अधिक सुलभ केली असून एक खिडकी योजना राबविली जात आहे. रस्ता तयार करण्यासाठी सात जागा मालकांनी तयारी दाखविली असून त्यांचे प्रस्ताव महापालिकेकडे देण्यात आले आहेत. अशी माहिती महापालिकेतील अधिकाऱ्यांनी दिली.
कात्रज – कोंढवा रस्ता रूंदीकरणाचे काम गेल्या अनेक दिवसांपासून रखडले आहे. वाहतूक कोंडीतून सुटका करण्यासाठी महापालिकेने रस्त्याच्या ५० मीटर रुंदीकरणाचे काम हाती घेतले होते, परंतु ते देखिल संथ गतीने सुरु असल्याचा आरोप नागरिकांकडून केला जात आहे. त्यात आता प्रशासनाने पुन्हा ८४ मीटर रुंदीचा करण्याच्या दृष्टीने कार्यवाही सुरु केली आहे. त्यामुळे आणखी किमान सहामहिन्यांहून अधिक काळ वाहतूक कोंडीतून सुटका होणार नसल्याचे बोलले जात आहे. परंतु महापालिकेने भूसंपादनाची प्रक्रिया वेगाने राबविण्याची मोहिम हाती घेतली आहे. त्यामुळे रस्त्याच्या कामाला वेग येणार असल्याचा दावा महापालिकेच्या अधिकाऱ्यांनी केला आहे. या रस्त्यावरील काही भागात समतल विलगकाचे (ग्रेड सेपरेटर), तसेच रस्ता रुंदीकरणाचे काम टप्प्याटप्प्यात केले जात आहे. या रस्त्याचे रुंदीकरण करण्यासाठी आवश्यक असलेल्या जागा देण्याची तयारी जागामालकांनी दाखविल्यानंतर त्यावर कार्यवाही करत तातडीने जागा ताब्यात घेण्याचे नियोजन पालिकेने केले आहे.
शहराच्या दक्षिण भागातील वाहतुक सुधारण्यासाठी कात्रज – कोंढवा रस्त्याच्या रुंदीकरणाचे काम हाती घेण्यात आले आहे. कात्रज-कोंढवा रस्ता रुंदीकरणाच्या कामाला ३१ ऑक्टोबर २०१८ मध्ये मान्यता मिळाली आहे. मात्र, भूसंपादनाअभावी या रस्त्याचे काम रखडले आहे. राजस सोसायटी ते कोंढव्यातील खडी मशिन चौकादरम्यानच्या रस्त्याचे रुंदीकरण गेल्या वर्षीपासून सुरू आहे. या रस्त्यावर वाहतूक कोंडी सातत्याने होत आहे. तसेच जड वाहनांची मोठी वर्दळ असते. त्यामुळे महापालिकेकडून ८४ मीटर रस्ता रूंदीकरण करू करण्याचा निर्णय घेतला आहे. या रस्त्याच्या कामासाठी राज्य सरकारकडून निधी मिळाला आहे. प्रामुख्याने कात्रज येथील राजस सोसायटी ते कोंढवा येथील खडी मशिन चौक या दरम्यानच्या रस्त्याचे रुंदीकरण करण्यात येणार आहे. या कामाला ३१ ऑक्टोबर २०१८ रोजी मान्यता मिळाली असून या भूसंपादन न झाल्याने रस्त्याचे काम रखडले आहे. या रस्त्यांच्या भूसंपादनासाठी ७१० कोटी हवे आहेत. भूसंपादनामुळे दीर्घकाळ रेंगाळलेल्या या रस्त्याची रुंदी ८४ ऐवजी ५० मीटर करण्याचा निर्णय महापालिकेने घेतला आहे. रस्त्याची रुंदी कमी केल्याने भूसंपादनाचा खर्च २८० कोटी रुपये इतका येणार होता. यापैकी राज्य सरकारकडून १४० कोटी रुपयांचा निधी महापालिकेच्या तिजोरीत जमा झाला आहे. या निधीचे जागा मालकांना वाटप केले जाणार आहे. काही भागात काम झाले असून, ग्रेड सेपरेटरचे काम सुरू आहे. जेथे जागा ताब्यात आल्या तेथे रस्ता बांधला जात आहे. रस्ता तुकड्या तुकड्यात कात्रज-कोंढवा रस्ताचे काही प्रमाणात टीडीआर देऊन भूसंपादन झाले आहे. त्यामुळे हा रस्ता तुकड्या तुकड्यामध्ये तयार आहे. रस्त्यासाठी आवश्यक असलेल्या जागेच्या भूसंपादनाअभावी रस्त्याचे काम रखडले होते. आता भूसंपादन प्रक्रियेला वेग दिला जात आहे.
दरम्यान, कात्रज- कोंढवा रस्त्यावरील वाहतूक कोंडी सोडवण्यासाठी या रस्त्याचे रुंदीकरण करण्याचा प्रश्न विधानसभेपासून ते लोकसभेच्या सभागृहात गाजला आहे. वाहतुकीच्या समस्येमुळे चर्चेत असलेल्या कात्रज-कोंढवा रस्त्यावरील वाहतूक कोंडी सोडविण्यासाठी या रस्त्याचे रुंदीकरण केले जात आहे. या कामाला अधिक वेगाने गती देण्यासाठी पालिका प्रशासनाने जोरदार प्रयत्न सुरू केले आहेत. रस्त्याच्या कामासाठी सात जागामालकांनी आपले प्रस्ताव पालिकेकडे सादर केले असून, याची तपासणी करून ही जागा तातडीने ताब्यात घेण्याचे नियोजन पालिकेने केले आहे. या रस्त्यावर पालिकेच्या वतीने उड्ढाणपूल बांधला जात आहे. यासाठी आवश्यक असलेल्या २८० मीटर रस्त्याचे तातडीने भूसंपादन करण्यासाठी पालिकेने प्राधान्य दिले आहे. या पुलासाठी आवश्यक ती भूसंपादन प्रक्रिया पूर्ण करून पालिकेने प्रस्ताव सादर केल्यास रस्ता तयार करण्यासाठी आवश्यक ती मदत करण्याचे आश्वासन केंद्रीय रस्ते विकासमंत्री नितीन गडकरी यांनी महापालिकेला दिले आहे. काही दिवसांपूर्वी महापालिका आयुक्त डॉ. राजेंद्र भोसले यांनी या रस्त्याच्या कामासाठी केंद्रीय मंत्री गडकरी यांची भेट घेत चर्चा केली होती. त्यावेळी त्यांनी महापालिकेला मदत करण्याचा शब्द दिला आहे.
About The Author
